حقيقة ولا خرافة (الحلقة الأولي)

تعرف انك ممكن تخس بس بممارسة الرياضة؟ 💡

تعرف ان الجو البرد هو السبب ف انك بتتعب؟ 💡

كل جزر كتير .. الجزر بيقوي النظر وبيخليك تشوف بالليل كويس. 💡

طبعا الكلام دا كله تهريج .. او خليني أصيغها بالشكل دا “خرافات” ❌❌❌❌

– لو عايز تخس ف بتقضي ع المشاية ساعات طول اليوم ممكن جدا ماتخسش عادي ،
الرياضة مهمة جدا للجسم وللصحة الفسية والعقلية كذلك ،
الرياضة تقدر تساعدك تحافظ على وزنك ، يعني هيثبت مش هيقل .. 🤷🏻‍♂

الخلطة السرية لخسارة الوزن ، نظام غذائي صحي (بيديك سعرات اقل من احتياجك) + ممارسة الرياضة.. ✌🏻

خليني افاجئك كمان. ☝🏻
الاصابة بدور البرد مالوش علاقة ببرودة الجو .
يمكن تكرار نزلات البرد بيكون اكتر ف الشهور الباردة خلال السنة ..
طيب بنتعب اكتر ليه ف البرد لما هو مش م البرد؟
ف البرد الناس بتميل للقعدة ف البيت او الاماكن المغلقة ، وقفل الشبابيك اغلب اليوم..
ودا بيبقى العيد القومي لفيرس الانفلونزا .. اللي بيحب البرد وبيحب اللمة ف فرصة انتقاله بين الاشخاص مع التهوية الاقل بيكون وارد اكتر ، وميكروبات تانية مش الانفلونزا بس ..

ف خلاصة الأمر نقص مناعتك ومقاومة جسمك + وجود بيئة خصبة للميكروب .. هو اللي بيتعبك مش الجو البرد. 🤝🏻

-ولو صحيح الجزر بيقوي النظر يبقى نزرع العالم كله جزر .. ووداعا للفلاش.🤩

الجزر كويس لنظرك اه .. ولكن مش للدرجة دي ..

فايدة الجزر تكمن ف ان فيه الكاروتين اللي الجسم بيستخدمه لتصنيع فيتامين A اللي بيساعد ف ان العين تحول الضوء لاشارة تبعتها للمخ ، ف اه بيسمح انك تشوف كويس ف الاضاءة الضعيفة ..
ولكن فيتامين A م الفيتامينات اللي بتذوب ف الدهون فقط ، ف عشان تدوب ويتم امتصاصها ف الامعاء واستفيد بيها لازم نسبة دهون ف الاكل..
شايف اللفة دي كلها؟! 😳
اغلب الدراسات اثبتت ان مكملات فيتامين A افيد وبتأثر اكتر بكتير من استهلاك مزارع الجزر.. ✌🏻

تابع موقعنا لمفاجآت اكتر لزعزعة استقرار معتقداتنا الطبية .. 🤓☝🏻

#حقيقة_أَم_خرافة