This entry is part 2 of 2 in the series حقيقة ولا خرافة


نصايح هامة للسيدات الحوامل .. 🗣

1-كلي كتير على قد م تقدري ، انتي بتاكلي لاتنين دلوقت.
2-لازم تاخدي مكملات بنسب كبيرة عشان الطفل يبقى صحته حلوة.
3-ماتاكليش أكل حراق ، لانه بيحرق عين البيبي ، وعشان بيعمل لك حرقان ف فم المعدة ، ولو اتكرر الحرقان راس البيبي هتبقى كلها شعر.
4-لو لقيتي نفسك ميّالة للحوادق تبقي حامل ف ولد ، لكن للحلويات تبقي حامل ف بنت.
5-خليكي نايمة طول اليوم مرتاحة ف السرير ، انتي محتاجة الراحة.

….

انتي لسة مكملة قراءة؟!
أكيد دا مش كلام حقيقي ، وبردو مش حلم .. 😅

احنا ف حلقة جديدة من حقيقة أَم خرافة. 😎

كلام كتير جدا بيتقال للحوامل من جارتها الخبيرة ، او من خالتها اللي مجربة ، او هي معتقدات بتتوارثها الأجيال .. والكلام دا أغلبه غلط .. ❌

وأنا كالعادة هنا عشان أقولك خدي معلوماتك من مصدر موثوق قبل م تصدّقي وأكيد قبل م تطبّقي. ☝🏻

خلال شهور الحمل إحتياجات جسمك بتزيد من المغذيات الكبرى والصغرى ،
احتياجاتك اليومية من السعرات بتزيد من 350 ل 500 سعر حراري فوق سعراتك الأساسية بتزيد ف حالة الحمل المتعدد (توأم) ، خاصةً خلال التُلت التاني التالت من الحمل.

وطبعا لو نظامك الغذائي ناقصه مغذيات أساسية ، كل دا بيأثر على صحتك وعلى نمو الجنين. 🤷🏻‍♂

**** هل دا معناه إني أفضل آكل آكل وأزيد ف الوزن براحتي مايهمنيش؟!
لأ طبعا 🤦🏻‍♂
خليني اقولك الاول ان طبيعي جدا يزيد وزنك خلال فترة الحمل كاملة حوالي 11 كيلو ، بسبب زيادة وزن بطانة الرحم + وزن الجنين والميا والاغشية اللي حواليه + احتباس جسمك للميا بسبب الهرمونات ، 💡
زيدي بس بطريقة صحية ..
زي ما نقص التغذية ضار ، ف الاكل زيادة عن اللزوم ضار بردو ، لأنه بيعرضك للاصابة بسكر الحمل ، وارتفاع ضغط الدم ، وتسمم الحمل ، ودا خطر كبير عليكي وع الجنين ، وبيهدد استمرار الحمل ، ولو الحمل اكتمل بتبقى عملية الولادة صعبة جدا ومعقدة ، ولا قدر الله ممكن الجنين ينزل بتشوهات. 😕

فببساطة .. هتختاري نظام غذائي صحي متنوع فيه كل المغذيات اللي هتحتاجيها ، وحاولي قد م تقدري تحسبي سعراتك وتضيفي عليها سعرات الحمل ، هتاخدي اللي انتي محتاجاه من غير م تأذي نفسك أو طفلك ، ومش هتزيدي ف الوزن بشكل كبير ، ف هتقدري ترجعي جسمك بسهولة بعد الولادة. 🤩

على سبيل المثال ..

*هتاخدي منتجات الألبان (المبسترة) لو ماعندكيش حساسية ضدها ، عشان احتياجاتك من الكالسيوم والبروتين..
هتاخدي البقوليات كمصدر للبروتين والألياف ، وحمض الفوليك (folic acid) المهم جدا ليكي قبل وخلال فترة الحمل.
*البطاطا .. مصدر كربوهيدرات والياف وفيتامين A
اسماك دهنية زي السالمون ..
اوميجا ثري. وفيتامين D
*البيض ، بروكلي وخضار ورقي .. لمضادات الأكسدة والمغنسيوم ، والفيتامينات.
*اللحوم الحمرا واللحوم البيضا ، مصدر بروتين حيواني عالي الجودة وكذلك الحديد ، وفيتامين B ..
*التوت والفراولة وعيلة الـ berries كلها .. غنية بمضادات الأكسدة ، وفيتامين C والالياف ..
*الحبوب الكاملة .. كونها كاملة بتبقى محتفظة بالالياف والمغذيات الصغرى الموجودة ف القشرة.
*الافوكادو .. بوتاسيوم ، فوليك اسيد ، احماض دهنية أحادية غير مشبعة ،
*الفواكه والخضار عموما .. والفاكهة المجففة لانها مركزة ف المغذيات الصغرى ، وحاجة مسكرة بتبعدك إلى حد ما عن كترة الحلويات والسكر الأبيض.
*شرب المياه بيساعد ف منع الامساك ، ومنع التهابات وعدوى مجرى البول ، ومنع الصداع والدوخة اللي بتيجي مع الجفاف.. 😇

***قلتلي ان جسمي محتاج مكملات وفيتامينات زيادة عن الطبيعي ، دا معناه اني أكتّر بقى مايهمنيش يا باشمهندس طارق؟!
لا يا ست الكل .. 🤓☝🏻
الحلقة الجاية هجاوبك ، وهفاجئك بخرافات أكتر تناقلتها الاجيال فيما يتعلّق بالحمل 💁🏻‍♂

استنونا ف حلقة جديدة ..

من #حقيقة_أَم_خرافة

Series Navigation<< حقيقة ولا خرافة (الحلقة الأولي)