=بقولك ايه انا قررت اخس ، ماتعرفش دكتور تغذية كويس اتابع معاه ! 😞
-يا ابني ماتروحش لدكاترة تخسيس دا كله كلام فاضي ، انا هقولك وصفة هتخسسك عشرة كيلو ف الأسبوع .. 🤓
– دا انت جيتلي نجدة من السما ايه الوصفة دي ! 🤨
= كل يوم ع الريق هتشرب كوباية زنجبيل وادعيلي .. لا هتحتاج دايت ولا بتاع. 👌🏻
…..
شايف اللي حصل من شوية دا؟🧐
دا اللي بيحصل كل يوم واللي بنسمعه كتير جدًا ، المشروب الفلاني قاهر الدهون ، الوصفة الفلانية هتخسسك النص ، اشربها قبل النوم هتصحى الصبح مش عارف نفسك .. 🤪
تفتكر دا يتقال عليه ايه ؟!
برافو .. خرااافة 🤬
قلنا قبل كدا ان الخلطة السرية لفقدان الوزن بصورة صحية وسليمة هي نظام غذائي صحي شامل عدد السعرات أقل م اللي الجسم بيحتاجها ، وممارسة الرياضة. ✌🏻
ولكن الوصفات اللي بتسمع عنها كل يوم والتاني دي يا إما غير فعالة أبدا ، او الفعّال منها مالوش لزمة أو تأثير بدون الخلطة السرية.. 🤷🏻♂
الزنجبيل من المشروبات اللي اشتهر عنها انها من حوارق الدهون الطبيعية ،
وماحدش شكك ابدًا ف المعلومة دي .
انا هنا مهمّتي أقولك اقرأ من مصدر موثوق قبل م تصدّق أي حاجة وطبيعي قبل م تطبّق أي حاجة. 👆🏻
الزنجبيل له فوائد صحية كتير جدًا ، ولكنه مش هيحرق الدهون ، ومش هيزود الحرق زي م بيتقال.
•الزنجبيل مضاد جيد جدا للالتهابات ، ولذلك مفيد بعد العمليات الجراحية .. او ف حالات الالتهاب المزمنة.
•مليء بمضادات الأكسدة .. اللي بتحمي من أمراض القلب ،امراض تآكل الأعصاب ، السرطان ،وعلامان التقدم ف السن.
•بيقلل الإحساس بالغثيان وبيساعد ف الهضم .. ف بينصح بشربه ف وقت الحمل.
•بيساعد مع وجع العضلات ، وآلام الدورة الشهرية.
…
طيب ليه اتقال عليه بيحرق الدهون؟! 🤦🏻♂
مفيش سبب عموما ، ولكن كل علاقة الزنجبيل بعالم الدايت والتخسيس انه بيظبط سكر الدم وبيحافظ على توازن مستوى السكر على مدار اليوم ،
ثبات مستوى السكر بيقلل الشعور بالجوع ، وبيقلل من فرص الرمرمة ف الأكل ..
ولكن هل بيحرق الدهون؟
لأ. 💡
بصوا ع المصادر ف اول كومنت ..
واستنونا ف حلقة جديدة ..
